6nemen9, 90. urtearen bueltan sortu genuen Elgoibarren. Hasieran 4 lagun ginen, Martzelo baterian, Josu baxuan, Alberto eta Asier gitarrarekin eta gutxira Mikel gehitu zitzaigun abeslari gisa. Denak ere autodidaktak eta hasi berriak ginen norbere instrumentuekin, nahiz eta musika ikasketak zituenik ere bazen tartean. Lehenengo kontzertua 1993ko maiatzean eman genuen Ondarruko Gaztetxean, herriko plazan Su eta Gar-en kontzertua izatekoa zen egun berean. Handik gutxira lehenengo maketa atera genuen eta berarekin Euskadi Gazteako maketa lehiaketa irabazi. Honek dirutza ederra ekarri zigun ordainetan, ez ordea bestelako bultzadarik. Gure musikak ez zuen orduko disko etxeen konfidantzarik irabazi, eta geure kontu jarraitu genuen, grabazioak egiten eta kontzertuak ematen taberna zulo eta gaztetxeetan, soinu aldetik baliabide arrunt eskasekin. Gerora bigarren maketa, Ertzetik eta CD bat ere atera genuen Pop-atic izenarekin, biak Little Fishekin grabatuak Bilbon. Azken CD hau Zabaltzen-ek banatu zuen, inongo oihartzun edo ondoriorik gabe. Gehienetan bakar xamarrik ibili ginen oholtzetan, ez genuen lortu inongo familia, gremio, mugida musikalekin bat egiterik. Hala ere, Garaiko Rock talde on askorekin jo genuen oholtza berean, hala nola, Ama Say, Cancer Moon, Bap!,Come, Xabier Montoia... Bereziki aipatzeko modukoak Ama Say, Po eta Lili Moon, beraiekin egin genuen amistadearengaitik. Gaur gero, urteak dira talde gisa desagertu ginenetik. Musikaren bueltan jarraitzen dugu batzuk, Alberto eta Martzelo Aterkingsen, Mikel musika elektronikoarekin eta Asier kantuak egin jo eta grabatuz bere kasa.