MySpace a place for friends

Bakin’ Blues Band é un proxecto musical que xorde a comezos do 2007 integrado por catro músicos de Compostela que veñen tocando en numerosas formacións da cidade dende o 1992. Nesta ocasión, e tras anos de trato coa música blues, jazz, country e soul; a proposta pretende unha destilación do que de común hai no interior destes estilos, traendo deste modo á música negra concepcións e estruturas musicais de todo estilo no que iso exista.
Como formación recente e experimental, a idea foi posta a proba durante o ano 2007 tendo unha moi boa acollida por parte do público en locais de Compostela, da Mariña Lucense e da Costa da Morte; así como en diversos festivais do verán. É este acontecer o que nos motiva a incluir Bakin’ Blues Band como unha opción máis nas redes culturais institucionais e así darlle unha maior difusión e crecemento.

Proposta Musical

Bakin’: [incontable]; cociñar no forno; cocción; tamén adxectivo: moi quente.

Blues: sensación de melancolía ou tristeza que tamén nomea o estilo musical ó que se refire Leadbelly cando di: "Ningún home branco sentiu nunca o blues porque ningún home branco tivo nunca preocupacións... Pero cando estás na cama e te moves dun lado para outro e non es quen de durmir, que é o que che pasa? Estás atrapado no blues. Ou cando te ergues na mañá e ficas sentado na beira da túa cama e non queres falar con ningén anque ninguén che fixo nada, que é o que che pasa? Estás atrapado no blues”. Blues, por tanto, algo no que se está ou que se ten.

Bakin’ Blues Band alude por tanto o que ten que ver con sentarse, xuntarse, contar historias cantando-rindo as penas. Aquilo que só pretende ser escoitado para formar parte. Para unir. Así como cando se escoita e se rí e se contan historias na cociña, mentres todo o atrasado se coce, se trocea, se manipula, se bota na pota ou se mete no forno. E hai unha espera común por algo para compartir.
Ocorre unha reunión de amigos trala cea e as mesmas ferramentas que serviron para comer serven agora para tocar e cantar.
Rebuscando nas lacenas, atopando sabores antigos que son indiferentes ó deseño e ó espectacular. O máis alonxado da vangarda.
Bakin’ Blues é esa reunión de amigos que desexan facer a música xuntos porque aí os seus afáns, miradas e afectos se atopan e fan sentido. A destilación do que importa na música tras moitos anos de querer triunfar. E xa se sabe que iso non é o que importa.
Bakin, por tanto, fai moitos anos que existe pero quizá agora é o intre de ofrecelo ó mundo, ós outros. Lembra cousas que non están de moda e non pasan de moda. Quizá aí resida o encanto. Non hai nada que demostrar cando se toca para os amigos. Iso non é espectáculo. Iso é simplemente construir o común.
Proposta musical: sinxelo. Tocar hora e media de todo aquilo que ten [o] blues.